అభివృద్ది

ఆకాశమంత ఎత్తున్న చెట్లని నరికించి

ఆకాశహర్మ్యములు కట్టించి వాటిపైకెక్కి

ఆత్మహత్య చేసుకోమనేదే అభివృద్ది

అడవితల్లిని అగ్నిదేవునితో అన్యాయంగా ముడిపెట్టి

పచ్చని వనాన్ని చితిమంటల స్మశానంగా మార్చి

బిల్డింగులు కట్టి అందులో బానిసలను నెట్టి 

డాలర్లను అడుక్కోమంటుంది అభివృద్ది

ఊళ్ళ కోసం రోడ్లను వేయడం కాదు

రోడ్ల కోసం ఊళ్ళకు ఊళ్ళే మాయం 

చేయమంటుంది మాయదారి అభివృద్ది

బానిసలచే పాలింపబడినంత కాలం

బానిసలలా ఆలోచించినంత కాలం

బానిస బ్రతుకుల నుంచి బయటపడనంత కాలం

బానిస స్వామ్యం ఇచ్చే అభివృద్ది ఇదే ...

లేకపోవటంలో

లేకపోవటంలో చాలావుంది

ఆకలి పస్తుల్లో ఆరోగ్యం వుంది

కష్టాలలో నమ్మకముంది

నష్టాలలో అనుభవముంది

దుఃఖంలో ఆత్మీయతుంది

ఓటమిలో పట్టుదల వుంది

అవమానంలో తెగింపు వుంది

లేకపోవటంలో చాలావుంది ...

పులగం

బియ్యంతో పెసరపప్పు కలిపి

నీళ్ళు పోసి కాస్త పసుపు చల్లి

పులగం వండి వార్చి

కలుపుకోడానికి వంకాయ కూర

నంజుకోవడానికి వేయించిన మిరపకాయలతో

వేడివేడిగా వెండి కంచంలో వడ్డిస్తే ...

నేలమ్మకు దగ్గరగా కూర్చొని

పులగంలో వంకాయ కూర కలిపి

చేతి నిండా తీసుకొని ముద్ద చేసి

నోటికందించి తోడుగా మిరపకాయ నమిలితే ...

అనగనగా ఒక మాట

అనగనగా ఒక మాట

మనుషుల మధ్య బంధాలు 

పెంచాలన్నా 

తెంచాలన్నా

ఎదుటి వ్యక్తి హృదయములో

స్థానం సంపాదించాలన్నా

మాట వల్లే

మాటతీరు వల్లే

ఒక మాట

వ్యవస్థని నిర్మించగలదు

అదే మాట తేడా ఐతే

వ్యవస్థని నశింపచేయగలదు

మాటంటే సరస్వతి

మట్లాడటమంటే వాణికి అర్చనే

ఆ వాగ్ధేవీ ప్రవాహాన్ని 

సత్కార్యాలకే ఉపయోగించి

శారదమ్మ ఆశీస్సులు పొందుదాం